Ituo goda golā, latgalīšu dzejnīkam, publicistam, kulturys i sabīdryskajam darbinīkam Ontonam Kūkuojam palyktu 80. Par gūdu tam kai projekts ir aizuokta juo literaruo montuojuma transformaceja jaunūs formatūs – tūp muzykaluo dzejis izruode, teik puorizdūta dzejis gruomota “Mīlesteiba, Lelais Līpu kolns”, Facebook kontā “OKa” kotru dīnu teik publicāts vīns O.Kūkuoja dzejūļs nu puorizdūtuos gruomotys, taipat iz goda golu byus ari izstuode i kalendars cytam godam.

“OKa ir Ontons Kūkuojs i vēļ golyutneite "a", deļ tam mes ari puorjiemem itū abriviaturu nu Ontona Kūkuoja i īlykom jū ari Facebook kontā. OKa ir tikai vīna daļa nu vysa projekta, kurs saucās “Iesākumā bija vārds. Antonam Kūkojam 80”… Itai idejai, var saciet, ka ir taišni gods. Projekta rezultatā byus gruomota, izruode, video, izstuode i Facebook konts OKa, nu i vēļ kalendars,” stuosta vīna idejis autorem J.Soikāna Ludzys muokslys školys direktore Sandra Vorkale.

Mīlesteibys stuostu dzejis izruodē izdzeivoj – nadzierdeiga meitine, aktrise Jolanta Znotiņa, i akters, muzikis Kristaps Rasims, kurs ļaunūtīs radeišonys procesam, izruodis topšonys laikā radejs treis jaunys dzīsmis ar O.Kūkuoja dzejis vuordim.

“Maņ cīši pateik, ka cylvāki maņ uzatyc i leidz ar tū es ari jim uzatycu, i, ka kimeja atļaun, tod vyss ari nūteik. I itymā gadejumā kimeja, maņ redzīs, ir vīnkuorši breineiga. Maņ ar Ontonu Kūkuoju ir tikai pošys lobuokuos sajiutys, attīceibys, cīši dažaidūs – gon muokslys, gon dzejis vierzīņūs. Mani jis vysod ir fasciniejs i fascinēs. Itei beja taida cīši breiva atmosfera, kurymā itys vyss var tapt. Kas? Tod jau redzēsit...

Dzīšmu raksteišona ar O.Kūkuoja dzeju ir sovpateiga, jo tei jau nav muzykai raksteita dzeja. Atsaškier.

Prūtams, ka eimūt cauri, losūt, es egoistiski suoku vērtīs, kur tys vyss ritmiski vīglai īsalīk vydā. Vysdreižuok, ka jam byutu pascāts itū dzejūli saraksteit dzīsmei, jis byutu pats vaira poddziņs ritmu. Šur tur es atsaļuovu salauzt ritmu.

Maņ pateik, kod tei nūskaņa dzejā ir atrosta cīši preciza, vysmoz maņ jei rezonej.

Kas nūteik tuoļuok, tys jau ir logiskys process, taipat kai vyss, kū mes dorim projektā i kū rudinī varēs apsavērt, vysūs formatūs. Mums nav apzynuoti izraksteita plana, kai mes dorim. Vyss nūteik pakuopeniski," tai muzikis i akters Kristaps Rasims.

Projektu eistynoj J. Soikāna Ludzys muokslys škola i bīdreiba“Teātris azotē”, kurys vadeituoja Marika Čerņavska ir dzejis izruodis idejis autorei režisore.

“Scenarejs topa ilgi, nu janvara leidz martam. Tei sajiuta maņ atguoja lānom, jo es poša ilgi vaicuoju ceļu iz Kūkuoja dzeju, kab es poša jū saprostu, tei maņī sapatyktu, jo ari maņ latgalīšu volūda suokumā beja škierslis, koč ari maņ babeņa ir nu Latgolys i es saprūtu latgaliski. Maņ tys ruodejuos kai breinums, kai pamozeišam veidojās tei kiede. Saturiski tei izauga spieceiguoka i nūpītnuoka nikai mes ceriejom i gaidejom…

Stuosts par cylvākim, kuri puorstuov divejis apdraudātys volūdys. Nadzierdeiga meitine, kura ari pīdar pi kultyrys minoritašu, kurai ir svareigi sasazynuot sovā mēlē, izapaust i tikt saprostai, i puiss nu Latgolys, muzikis, kuram, sovukuort, ir cīši svareiga muzyka i latgalīšu volūda. Jī īsaļūbej vīns ūtrā.”

Itei izruode pamatā ir dūmuota jaunīšim i iz prīšku teik planavuots jū izruodeit ari školuos, ka īsadūs, ari īkļaut “Skolas soma” programā.

Kristaps Rasims atkluoj, ka Ontona Kūkuoja dzeja ir sovpateiga i sovā ziņā unikala.

“Poetika, bet ari naz kas absoluti myužeigs. Reizē – tik cīši laiceigi i ite. Tymā pošā laikā, kod jis ir azara viļņs bez suokuma i gola. Nazkas cīši natverams, bet ari ar jaunu frāzi jis mani nūsādynoj ite, zam ituos līpys. Kluotyn… Maņ redzīs, ka muokslys absolutuo burveiba ir tymā pretrunā. Jo genialuoka dzeja, jo vaira tymā pretrunu. Lobā nūzeimē.”

Puorizdūtajai gruomotai “Mīlesteiba, Lelais Līpu kolns” tiks davīnuots QR kods, kas aizvess iz izruodi škārsteiklā. Itei byus pyrmuo gruomota, kuru reizē varēs skaiteit ari naredzeigī i vuojredzeigī ļauds.

“Braila roksts dasavīnuoja, kab mes padareitu itū gruomotu vēļ bogotuoku, jo breineigi, ka ari cylvāks, kurš naradz, varēs skaitiet itū dzeju par ļūbesteibu. Jis jū dzierdēs, varēs patausteit. Tys, kurš radz, jis ari varēs drupeit pīsatyvuot tam pasauļam, kuram jis, paļdis Dīvam, nav pīsaisteits."